ايه هو علم النفس الاجتماعي Social Psychology؟

خليك فاهم مبدئيا ان الهدف من أي علم تجريبي هو محاولة التنبؤ باللي هيحصل

انت لما بتدرس الحركة في الفيزيا مثلا، بتدرسها عشان تقدر توصل لقانون ثابت يعرفك الكورة دي هتقع فين لما تضربها بزاوية كذا، وهتتحرك بسرعة كام لما ترميها بقوة كذا.. الخ

أما بخصوص علم النفس: فهو علم هدفه انه يتنبأ بسلوك الانسان وتصرفاته

الانسان ده هيتصرف ازاي لما يبقى في الموقف الفلاني، وهيعمل ايه لما يتعرض للموقف ده، وليه عمل كذا وليه معملش كذا

واللي بيساعدك في كده انك تحاول تكتشف كل حاجة بتأثر على تصرفاته وتدرس العلاقة بينها وبين تصرفاته

ايه الفرق بين علم نفس الشخصية وعلم النفس الاجتماعي؟

باختصار، علم نفس الشخصية بيركز أكتر على طبيعة شخصية الانسان، والفروقات الفردية الموجودة بين كل انسان والتاني،

أما علم النفس الاجتماعي بيتجاوز الفروقات الفردية نوعا ما، وبيركز أكتر على طريقة تأثر الانسان بالبشر اللي حواليه عموما

علم النفس الاجتماعي بيحاول يوصل لقوانين عامة ممكن تتطبق على كل البشر باختلاف ثقافاتهم وشخصياتهم بتفسر ازاي تصرفاتهم بتتأثر بوجود اشخاص تانيين حواليهم

دايما لما حد يتكلم عن تأثير المجتمع، أول حاجة بتيجي فبالك هي الاعلانات والدعايا أو محاولة شخص انه يقنع شخص تاني، أو مجموعة من الناس، وده فعلا داخل في الموضوع وهنتكلم عنه بالتفصيل في فصل جاي ان شاء الله

لكن التأثير الاجتماعي عليك بيبقى أكبر من كده بكتير، الانسان بيتأثر بالبشر اللي حواليه من يوم ما يتولد لحد ما يموت

أفكارك ومعتقداتك وتصرفاتك ونظرتك للعالم بتتأثر بالبيئة اللي اتربيت فيها، وتصرفات الناس حواليك ومعتقداتهم بطريقة أو بأخرى

ايه الفرق بين علم النفس الاجتماعي وعلم الاجتماع Sociology؟

الفرق الأول ان علم الاجتماع بيدرس الأحداث اللي بتحصل داخل المجموعة، الشعب، الأسرة، القبيلة، وبدرس تفسير الظواهر دي، وبيبحث هل هي اللي بتشكل الانسان، ولا الانسان اللي بيشكلها

بينما علم النفس الاجتماعي بيدرس اللي بيحصل جوا عقلك انت، وايه اللي بيأثر على تفكيرك، ازاي بتترجم الأحداث دي، وازاي بتفسرها

يعني لو انت شخص عدواني، علم النفس الاجتماعي غالبا هيحاول يدرس الاسباب النفسية اللي ساهمت في ده، هل الشعور بالاحباط هو السبب؟ ولا الشعور بالغضب؟ أو حاسس انك منبوذ؟ أو شايف انك افضل من غيرك..الخ

اما علوم زي الاقتصاد وعلم الاجتماع هيهتم بعوامل تانية، زي حالتك الاقتصادية، مكانتك في المجتمع، تاريخ العيلة بتاعتك، او تاريخ بلدك، تقاليد القبيلة بتاعتك.. الخ...

الفرق التاني ان علم النفس الاجتماعي مبيهتمش بالظروف والأحداث عادة، وبيركز أكتر على طريقة ترجمتك انت للظروف دي

يعني لو افترضنا ان عالم نفس اجتماعي دخل مطعم عشان يتطمن على سلامة الأكل

عالم النفس الاجتماعي مش هيحلل الأكل ولا يتأكد من نظافة الأسطح ولا هيبصلها أصلا

هيدخل بكل بساطة يسأل الناس الموجودين: هل انتو شايفين ان الأكل اللي بيتقدم هنا صحي؟

لو مقتنعين بكده يبقى قشطة

عالم النفس الاجتماعي مش هيسألك انت رصيدك كام في البنك، بس هيسألك انت حاسس انك غني ولا لأ

ببساطة علم النفس الاجتماعي بيدرس رؤيتك انت للمجتمع، ومش مهتم يدرس اللي بيحصل في المجتمع نفسه

يعني لو شخص غريب شتمك في الشارع غالبا هتتعصب وتقوم تتخانق معاه

بينما لو واحد صاحبك شتمك نفس الشتيمة ممكن تاخدها بهزار وتضحك بسببها

هنا علم النفس الاجتماعي مبيدرسش طبيعة الفعل اللي حصل نفسه - الشتيمة - هو بيدرس "ترجمتك" انت للموقف

your "construal" of sitiuation

هل انت شايفه تصرف لطيف ولا عدواني، وليه فسرته كده

طبعا محدش قال ان علم النفس الاجتماعي منفصل 100% عن باقي العلوم اللي ذكرناها فوق، أكيد في بينهم نقاط مشتركة كتير - منها الاسم مثلا هه -، وكمان كلها علوم متعلقة بسلوك الانسان وبتحاول تتنبأ بتصرفاته، لكن كل مجال بيدرس جانب مختلف من سلوك الانسان، وبيركز على عوامل معينة اكتر من غيره

لو لسة مستوعبتش الفرق أوي متقلقش، الكتاب مليان أمثلة، وحوادث حصلت قبل كده، وتجارب هتساعدك تفهم ايه هي القضايا اللي بيناقشها العلم ده بالظبط

أخيرا، ايه الفرق بين الكلام اللي هنقوله في الكتاب ده ان شاء الله وبين الكلام اللي اتكلمه الفلاسفة والأدباء عن طبيعة الانسان؟

الفرق الوحيد إن المبادئ اللي في الكتاب مشتقة من أبحاث وتجارب خاضعة لأسس العلم التجريبي، واحنا بنتكلم هنا عن علم حديث نسبيا نشأ في القرن اللي فات بس

بينما الأفكار الواردة في الكتابات الأدبية والفلسفية بتبقى غالبا عبارة عن مجرد آراء شخصية

في الفصل الجاي هنتكلم أكتر عن إزاي التجارب والأبحاث العلمية دي بتتم، وايه اهم الحاجات اللي محتاج تعرفها عشان تقرا بحث أو تجربة وتناقشها وتفسر نتايجها صح

__________________________________________________________________

دي كانت ورقة بتلخص مقدمة أول فصل في كتاب Social Psycholog

الورقة الجاية: قوة التأثير الجمعي

خلاصة

0 متابَعون

خلاصة

0 متابَعون